Snart ferie

Kort oppdatering. Kontoen min har blitt noko feitare, brunfargen min noko sterkare, beina mine noko stivare, og lysten på ferie noko meir intens.

Litt meir konkret forklart, så har eg i det siste jobba, solt meg, putta gåll etter gåll på Tysnes Cup (6 på 5 kampar, for å vere heilt nøyaktig. Ventar på telefon frå Steinar kvart øyeblikk) og.. ja, blitt meir umotivert fordi eg har lyst på ferie.

På laurdag fer eg avgarde til Mandal ei veke. Det blir supert. Mandal er ein flott ferieby som alle burde reise til. Det blir heilt sikkert ein flott ferie.

Det er berre ein ting som manglar.

Sommar

Lenge sidan sist eg oppdaterte. Som om nokon bryr seg, men likevel.

Det er sommar. Eg har stått på begge eksamenane mine, og eg kan plusse på 30 nye studiepoeng til søknaden til bachelorgrad i nye medier på UiB neste haust.

Dei 442 kronene på kontoen min blir forhåpentligvis trylla om til drøyt 25000 i løpet av dei neste vekene fram til ferien. Blir meir og meir glad i administrasjonen på Harding som, sjølv etter først å ha sagt nei til søknaden min, headhuntar meg og gir ein udugelig montør som meg sjølv arbeid for 150 kr timen. Fantastisk.

Det er heller ikkje så verst at Brann slo Lyn i kveld. Nærmar seg jammen medaljestrid i Idrettsveien. Ventar framleis på årets første 0-6 for Brann.

Kort oppsummert, livet er ikkje så aller verst for tida. Dersom eg klarer å gjennomføre styrkeprogrammet eg har fått tilsendt av Sjefen, skal nok dette bli ein givande sommar.

Phail?

Då var første eksamen unnagjort. Det er vel ikkje så mykje anna å seie om den enn at eg er meget skeptisk med tanke på å stå. Var maks uheldig med spørsmåla i eitt av delfaga, og klarte såvidt å skrible ned det einaste vetle eg visste om spørsmålet. Men me får sjå. Det viser seg at store mirakel kan skje. I går, for eksempel, viste Azar Karadas målteft, i tillegg til at han slo ein følsom gjennombrotspasning. I tillegg brukte Petter Vaagan Moen utsida av venstrefoten og avslutta i mål. Dette viser at kva som helst kan skje. Ser ikkje vekk i frå at Kristjan Örn Sigurdsson limer ballen i krysset frå 30 meter om ikkje lenge.

Akkurat no har eg tatt meg ein liten pause frå lesinga til ENG124. Eg har gått gjennom ein del verk, og syns eg har vore ok flink i dag. Føler eg har ein viss plan med lesinga, og håpar mengden lesing er bra nok til å hugse noko når eg står føre den ekle Oxford/Cambridge- professoren som eg fryktar skal vere tilstades på eksamen på torsdag. Stryk i 124 ville vere døden for meg. 106 kan eg eventuelt ta opp og stå på på eit seinare tidspunkt. Forhåpentligvis til hausten. Eg håpar berre ikkje å stryke der er utslagsgivande i forhold til å komme inn på bachelorstudiet i nyare medie eller medievitenskap, som er dei to studia eg har søkt på.

Tida vil vise. Akkurat no viser tida at eg må returnere til William Wordsworth og finne ut kva han meiner med "Tintern Abbey". <-- Den førre setningen kan betraktast som eit stille rop om hjelp.

Stress.. neh!

Den siste tida, det vil sei dei siste tre dagane, har eg lest på eksamen som eg skal ha den 19.mai. Det er ein eksamen i sosiolingvistikk og grammatikk. Begge desse faga er kjedelige, spesielt grammatikk. Eg hatar å lese til denne eksamenen. Det seier seg sjølv at det vert mykje hating når eg må lære meg eit halvt års pensum på ei drøy veke. Det skal nemnast at eg har sett meg sjølv i denne situasjonen, men det blir berre ein bisetning. Korleis ellers skulle eg lest? Lest jamnt og trutt gjennom heile skuleåret? Hah! Eg ler av folk som ikkje har null peiling på det dei driv på med to veker før eksamen. Er ikkje medlem av 'Norsk Skippertaksforening' for ingenting.

Fekk også vete hin dagen at eg skal ha min andre eksamen 28.mai. I det faget eg skal ha eksamen i, Britisk Litteratur og Kultur, veit eg om mogleg enda mindre om kva me har til pensum. Det kan fort bli ei småkritisk veke mellom eksamenane. Men det eg vel å fokusere på i forhold til eksamensdatoen, er kor perfekt eksamensdatoen passar meg.

- Eg er ferdig med eksamen i veke 22. Eg skal forhåpentligvis byrje å jobbe i veke 24. Dette betyr at eg får ei heil veke der eg kan ha fri og le av alle andre som ikkje er ferdig på skule og med eksamen.
- Guitar Hero: Metallica kjem ut 29.mai i Europa. Dette betyr at spelet kjem ut akkurat når eg er fri frå britiske 1700-talsdikt og liknande. Kombinert med ei heil veke fri kan dette bli happy time!

Berre eg står på eksamen, så kan dette bli ein riktig trivelig sommar faktisk. Det treng eg.

Kort update

Eg er framleis like slapp og umotivert.
Eg har framleis lest like lite på eksamen
Eg har framleis ikkje vent meg av med å spele WoW.
Eg har framleis ikkje klart Sweet Home Alabama på Expert.
Eg har framleis ikkje skreve jobbsøknad til Harding i sommar.
Eg har framleis ikkje bestemt meg heilt kva lag eg skal spele for neste sesong.
Eg har framleis ikkje vaska av steikepanna etter tacoen sist veke.
Eg har framleis ikkje kjøpt nye ting til leiligheten som eg sa eg skulle gjere.
Eg har framleis ikkje stått opp før 12 denne veka.
Eg har framleis ikkje lagt meg før 3 denne veka.

Då har eg oppdatert dykk på nokon av bekymringane mine.
På plussida:

Eg har faktisk gått inn i ein klesbutikk og med overlegg kjøpt klede til meg sjølv!

Når sånt skjer, kan ingen bekymringar i verda overgå det.

Påsken

Ai, ai, ai! For ein påske! Kvar skal eg begynne?

Den entusiastiske starten var nok berre lureri.
Eg har knapt gjort noko som helst i påskeferien. Eg har vært ekstremt aktiv i den virtuelle verden, og dei fleste som kjenner meg skjønner nok før eg skriv det at eg har brukt store deler av tida på å game WoW. STORE deler. Faktisk så store deler at eg dei stort sett berre var avbroten av måltid, søvn og volleyballtreningar. Før ferien sa eg til meg sjølv at eg skulle jobbe med kultur-essayet mitt, trene styrke, padle kajakk, gå fjellturar, komme meg i skitrekket, lese bøker og vere sosial. Men neida. Det dumme dataspelet saboterte dei planane. Eg gler meg til sommaren. Då skal eg nemlig slutte. Eg skal iallfall prøve.

Eg har i det minste fått trent litt volleyball. Har forsåvidt vore kjekt å trene, men eg merkar at eg er veldig lei akkurat no. Treng ein lengre pause før eg skal prøve å få litt god grunntrening i sommar, for å gjere meg klar til ein ny sesong. Når det gjeld kor eg skal spele neste år, så trur eg at eg har bestemt meg. Skal sove litt meir på det.

Framover ventar ein hektisk periode på skulen. Nytt essay-utkast skal inn på fredag, og samtidig bør eg jobbe med det andre essayet mitt, og på toppen av alt nærmar eksamen seg med stormskritt. Med tanke på den minimale innsatsen eg har lagt ned i skulearbeid i år, ser det stygt ut. Men skal no berge ståkarakter. Men eg gruar meg.

Påsken i år har altså vært fryktelig innhaldslaus, likevel klagar eg ikkje. Avslappande var det iallfall. Men eg fekk ikkje påskeegg ><

Gull!

Det vart gull på Nyborg! Me spelte ein dårlig kamp, men likevel vant me greitt 3-0, og kunne juble for gull. Eg fekk spele ein rotasjon bak, litt skuffa over det men det tenker ein ikkje på når me har vunne gull! Medaljeseremonien etterpå trur eg var noko av det kjekkaste eg har vore med på. Etterpå bar det rett heim til Siljanders på gullfest. Mykje drikke vart konsumert og det var meget god stemning! Heldigvis drakk eg sjølv beherska og fekk lov til å vere den som lo av den fullaste fyren (les: Kriss) denne gongen. Etter at mesteparten var gått heim (Kriss blei vel slept/kjørt heim, men det er ein detalj), bestemte me oss for å tilbringa ein drøy time i jacuzzien til Siljanders. Ein meget bra avslutning på ein meget bra fest.

I det heile tatt var dagen veldig inspirerande for framtida, og eit godt argument for å spele for Nyborg neste år. Ikkje berre det å vinne gull, men og at eg fekk signal om at eg vil bli satsa på neste år dersom eg bestemmer meg for å skifte. Det avhenger likevel av fleire ting, bl.a konkurransen i Nyborg, om Rossvoll finn ein erstattar for meg, og korleis opplegget blir i Rossvoll denne sesongen.
Det blir nok ein runde eller to i tenkeboksen fram mot neste sesong. Likevel må eg vel halde fokus mot neste helg, sidan me då har årets to siste kampar. Veit ikkje om eg skal vere med eingang, men må vel vere fokusert heilt til eg høyrer at eg ikkje skal det. Dersom eg ikkje skal det, så blir det nok ein aldri så liten pubkveld heime på bygda :)

No er klokka 03.32, og eg går og legg meg.